Newcastle getur sett nýtt met
Newcastle United getur sett nýtt félagsmet með því að vinna tíunda leikinn í röð í öllum keppnum þegar liðið fær Bournemouth í heimsókn á St James’ Park í hádeginu á morgun.
Alexander Isak skoraði fyrstu tvö mörkin fyrir Newcastle í 3:0-heimasigri liðsins gegn Wolves í miðri viku en það var níundi sigur liðsins í röð í öllum keppnum.
Isak hefur verið stórkostlegur á leiktíðinni og með þessum mörkum í síðasta leik varð hann fjórði leikmaðurinn í sögu ensku úrvalsdeildarinnar til þess að skora í átta deildarleikjum í röð. Jamie Vardy á enn metið þar sem hann skoraði í ellefu deildarleikjum í röð árið 2015.
Newcastle hefur unnið síðustu sex deildarleiki sína með markatölunni 18:1 og liðið situr nú í 4. sæti ensku úrvalsdeildarinnar með 38 stig, aðeins fimm stigum á eftir Arsenal í 2. sætinu og níu stigum á eftir toppliði Liverpool.
Gestirnir á morgun
Undir stjórn Andoni Iraola hefur Bournemouth tileinkað sér kraftmikinn leikstíl á þessari leiktíð. Iraola hefur innleitt hugmyndafræði sem leggur áherslu á mikla ákefð, hraðar skyndisóknir og beinskeyttan leikstíl með löngum sendingum.
Sem stendur er Bournemouth í 8. sæti, aðeins fjórum stigum á eftir Newcastle og hefur komið sér í stöðu sem alvöru keppinautur í efri hlutanum. Lykilleikmenn Bournemouth hafa verið frá vegna meiðsla, eins og Evanilson, Enes Ünal og Luis Sinisterra, en þrátt fyrir það hefur liðið sýnt ótrúlega seiglu.
Bournemouth er sigurlaust í síðustu fimm heimsóknum sínum á St James’ Park í öllum keppnum en síðasti sigur liðsins þar kom í nóvember 2017 þegar Eddie Howe, núverandi stjóri Newcastle, stýrði Bournemouth.
Líklegt byrjunarlið Bournemouth: 4-2-3-1; Travers; Cook, Zabarnyi, Huijsen, Kerkez; Christie, Adams; Brooks, Kluivert, Semenyo; Ouattara.
Newcastle-liðið á morgun
Eddie Howe sat fyrir svörum fréttamanna á blaðamannafundi í dag. Howe sagði að Fabian Schar væri ekki orðinn 100% klár eftir að hafa glímt við veikindi í vikunni og óvíst væri með þátttöku hans í leiknum.
„Þetta verður nánast sama liðið og mætti Wolves á miðvikudagskvöld,“ sagði Howe á blaðamannafundinum.
Jamaal Lascelles, Harvey Barnes, Callum Wilson og Nick Pope verða áfram á meiðslalistanum. Howe sagði að Pope yrði mögulega klár gegn Southampton þann 25. janúar og Wilson myndi líklega snúa aftur til leiks í byrjun næsta mánaðar.
